Pasambahan Siriah

Sairiang balam jo barabah

Balam tibo barabah mandi

Samo mambumbuang kaduonyo

Sairiang salam dengan sambah

Salam tibo sambah kumbali

Tabao rendong kasadonyo

Assalamu alaikum wr.wb

Dihari nan sahari nangko, dimaso katiko kini, hari baiak katiko elok, ombak tanang angin salasai, kok tamu lah sapanuah rumah, kok alek lah sabaliak kampuang, dek adaik kapalo baso, banamo siriah jo carano.

Ramo – ramo tabang malayang, maraok ka sawah tangah, banyaknyo ampek puluah ampek, indah carano bukan kapalan, talatak ditangah-tangah, dilingkuang kito nan rapek.

Konon pulo caranonyo, Carano ameh kasakitan, tuangku guguak koto gadang, dibuek urang sungai pua, jongkok nan bak tiung ka tabang, kunkunnyo bak gagak ka inggok, nan rimbun bungo kacimbuang, balitik jo pucuak rabuang, batutuik dulamak makah, satahun dipaga munggih, samusim dilingka cino, usah ratak rengeh pun tido.

Dicaliak pulo siriahnyo, siriah udang tampak hari, tampaknyo bak kuku balam, gagangnyo bagai suaso, buah diambiak ka tinaman, daun diambiak ka tiruan, satahun dalam panggulungan, usah layua batambah hiduih.

Lorong kapado pinangnyo, pinang sierak erok manih, tumbuah di kida rumah gadang, tingginyo panjek-panjek an, randahnyo jangkau-jangkauan an, daunnyo malambai dalam lautan, tibo dipulau batebaran, dijuluak galah tak sampai, dijambo tanga balabiah, tibo nan pandai ma ambiaknyo, jatuh sakiro ka digatok, satahun tupai dek mamanjek, indah basuo dibuahnyo.

Dicaliak pulao ka gambienyo, gambie kuniang sarupo dadiah, buatan puti sarilamak, tampangnyo tareh surambi, galeh nak urang payakumbuh, digatok pamakan siriah, mamerah sampai ka bibia, mancayo sampai ka muko, harago dak taharagoi, harago satimbang jo nagari, pamerah bibia puti-puti, makanan sutan jo panghulu,

Lorong kapado sadahnyo, sadah putih bak banak balam, kulik pensi asa mulonyo, dibuek urang tapi danau, dibasuah jo aia ambun, dipati jo pati santan, dikipeh jo ambai-ambai, digiliang jo tupak tangan, dipaliak jo jari manih, bakisa jo jari tunjuak, diraso jo ujung lidah, manihnyo tingga dibibia, kaleknyo tingga dikarangkungan, harago dak taharagoi, sakadam sakati limo, sapaliak sapuluah ameh,

Dicaliak timbakaunyo, timbakau aluih ambun bujano, buatan anak sutan bentan, kiriman anak garagasi, saheto panjang jamuanyo, dijamua dibiliak dalam, bapangtang masiak dek paneh, masiak dek ambun tangah malam.

Tanam siriah tanamlah udang

Tanam karakok di halaman

Cabiak siriah makanlah pinang

Gilianglah rokok ka pamenan

Hiliakan sawah di alai

Mudiakkan sawah di taruko

Kok banyak bana siriah dibalai

Sakiro iko dalam carano

Induak ayam tabang batali

Dilurah mangko maraok

Anaknyo turun salapan

Makanlah sirih pinang kami

Bapapatah mangko dicabiak

Baibaraik mangko dimakan

Sapahnyo bari junjungan

Sirih bacabiak mintak dimakan

Pinang sagatok mintak dikunyah

Nan sanang hati sipangkalan

Paririk an dek angku jo niniak mamak

Sarato hadirin kasadonyo

Gayuang tak usah ka disambuik

Kato tak usah ka dijawab

Jo karajo sajo bairingan

Cerek ketek ditapi banda

Kalo rabah tolong tagakan

Denai ketek baru baraja

Kalo salah mintak dibatuakan

Wassalamu alaikum wr.wb